Қарағанды облыстық «Әнет баба» мешітінде қасиетті Рамазан айына орай ауызашар ұйымдастырылды. Игі іс-шараны аймақтық «Уақып» қайырымдылық қоры мен «Зекет және қайырымдылық» қоры бірлесе өткізді.

Берекелі кешке Қарағанды қаласындағы көше тазалығын қамтамасыз етіп жүрген еңбек адамдары мен түрлі жоғары оқу орындарында білім алып жүрген студенттер арнайы шақырылды. Бұл – қоғамға еңбегімен үлес қосып жүрген қарапайым жандар мен болашақ жастарға құрмет көрсету әрі қасиетті Рамазанның мейірімге толы рухын бірге сезіндіру мақсатында ұйымдастырылған игі қадам болды.

Кеш барысында қатысушыларға Рамазан айының маңыздылығы туралы уағыз-насихат айтылып, исламдағы ауызбіршілік, сабыр мен қайырымдылық секілді құндылықтар кеңінен түсіндірілді. Жиналған жамағат арнайы жайылған дастарханнан ауыз ашып, дұға жасады.

Қайырымдылық қорларының өкілдері бұл бастама алдағы уақытта да жалғасатынын айтып, ел ішіндегі бірлік пен жанашырлықты арттыратын іс-шараларға белсенді атсалысуға шақырды.

ҚМДБ Қарағанды облысы өкілдігінің баспасөз қызметі