«Ислам және отбасы құндылығы» жылы аясында және Наурыз мерекесінің құрметіне орай Қарағанды облысы, Абай ауданына қарасты Топар кентіндегі «Жұмабек Тәшен» мешітінде ұлтымыздың ұлы дәстүрі – бесікке салу рәсімі өтті.
⠀
Салт пен сенімді сабақтастырған рухани іс-шарада ақ жаулықты әжеміз:
⠀
«Бесіктің табаны мен арқалығы талапқа сай жасалған кезде ғана, сәбидің бойы талдай түзу, тарыдай мінсіз болмақ. Қазақта “тал бесік” дейтін бесік түрі бар. Бала осы бесікте жатқанда тоңбайды, суық тимейді, күн шалмайды. Жел, жын-жыбыр, құмырсқа сияқты зиянды жәндіктер жоламайды.

Бесікті аттың алдына алып жүруге де ыңғайлы. Анасы баланы қиындықсыз емізе алады. Ең бастысы – шүмек пен түбектің арқасында бесіктің іші әрдайым таза тұрады» – деп, бесіктің қасиетін кеңінен түсіндіріп, жас баланы бесікке салу рәсімін өткізді.
⠀
Шараға арнайы қатысқан аймақ имамы Мурсали Қаленұлы жас ұрпаққа ізгі тілегін арнап, бата берді.
⠀
Бұл шара халқымыздың салт-дәстүрі мен ислам құндылықтарының үндестігін айшықтап, ұмыт бола бастаған ұлттық мұрамызды қайта жаңғыртуға үлес қосты.
⠀

ҚМДБ Қарағанды облысы өкілдігінің баспасөз қызметі