Қарағанды облыстық «Әнет баба» мешітінде Ұлыстың ұлы күніне орай тайқазанға наурызкөже әзірленіп, ауызашарда 350 адамға таратылды.

Көне дәстүрді жаңғыртқан бұл іс-шара көктемнің алғашқы күндерінде жамағатқа ерекше көңіл-күй сыйлады. Жуанның жіңішкеріп, жіңішкенің үзілер қараөзек шақта адам ағзасы әлсірейді. Осы мезгілде құнарлы тағамның пайдасы зор. Қазақ халқы ежелден бұл дәстүрге ерекше мән беріп, наурызкөжені адамға пайдалы жеті түрлі дәмнен дайындаған.

Әжелеріміз бен аналарымыздың ұрпақ саулығын ойлап жасаған бұл тағам ағзаға қажетті дәрумендер мен қуат беретін қоректік минералдарға бай. Бүгінгі медициналық зерттеулер де наурызкөженің денсаулыққа оң әсер ететінін дәлелдеп отыр.

Мұндай ауқымды көлемде наурызкөжені Қарағанды облыстық «Әнет баба» мешіті әзірледі. Игі бастаманы ҚМДБ Қарағанды облысы бойынша «Уақып» қорының жауапты маманы Бақдәулет Қыдырбайұлы мен «Зекет және қайырымдылық» қорының жауапты маманы Асылхан Рахымжанұлы ұйымдастырды.

Ұлт дәстүрін ұлықтаған ізгі іс жамағатқа ерекше рухани әсер қалдырды.

ҚМДБ Қарағанды облысы өкілдігінің баспасөз қызметі