Шахтинск қалалық «Нұр» мешітінде Ұлыстың ұлы күні – әз-Наурыз мейрамына орай «Аталар мектебі» жамағат пен жастарға арнайы ауызашар берді. Берекелі дастарқан басында ұлттық тағамымыз – наурыз көже ұсынылып, жиналған қауым бірлік пен ынтымақтың үлгісін көрсетті.

Ауызашар барысында мешіттің бас имамы Мәулен Әбілхайыр Кәсенұлы жамағатқа «Рамазан айының соңғы он күні» тақырыбында тағылымды уағыз-насихат айтты. Ол қасиетті Рамазан айының соңғы он күні құлшылықты арттырып, Алланың разылығына ұмтылатын ерекше уақыт екенін атап өтті. Әсіресе, мың айдан да қайырлы Қадір түнінің қадір-қасиетіне тоқталып, көпшілікті құлшылық жасауға, сабырлық танытуға және бірлікте болуға шақырды.

Іс-шараға жиналған жамағат рухани сұхбат құрып, Наурыз мерекесінің шариғаттағы орны, ұлттық салт-дәстүрлер мен рухани құндылықтарды сақтау жөнінде пікір алмасты. Осындай тағылымы мол іс-шаралар мешіттің рухани әрі мәдени орталық ретіндегі рөлін арттырып, жамағат арасындағы бауырмалдық пен достықты нығайтары сөзсіз.

Алла Тағала жасаған дұға-тілектерімізді, берген ауызашарымызды қабыл етсін!

ҚМДБ Қарағанды облысы өкілдігінің баспасөз қызметі