Қасиетті Рамазан айының құрметіне Шахтинск қалалық «Нұр» мешітінде ерекше қайырымдылық іс-шара өтті. Мешіттің бас имамы Мәулен Әбілхайыр Кәсенұлының ұйымдастыруымен қаладағы бүлдіршіндерге «Рамазан тәттісі» үлестірілді.

Бұл игілікті істің басты мақсаты – балалардың жүрегіне қуаныш сыйлап, жас ұрпақты ізгілік пен мейірімділікке тәрбиелеу. Іс-шара барысында мешітке келген жас бүлдіршіндерге алуан түрлі тәттілер салынған арнайы қорапшалар табыс етілді.

Жиында сөз алған мешіттің бас имамы Мәулен Әбілхайыр Кәсенұлы:

«Рамазан – тек ораза ұстап қана қоймайтын, жақсылықты көбейтіп, қайырымдылықты арттыратын мейірім айы. Біз осы айда балаларға шаттық пен қуаныш сыйлау арқылы олардың жүрегіне жылулық ұялатып, жақсылыққа баулуды көздедік», – деп атап өтті.

Сондай-ақ мешіт ақсақалдары бүлдіршіндерге ақ батасын беріп: «Болашақта елдің елеулісі, халықтың қалаулысы болыңдар!» – деп тілектерін жеткізді.

Осындай мейірім мен ізгілікке толы қайырымдылық іс-шаралар қоғамдағы татулықты нығайтып, балалардың жүрегінде ізгілік пен жақсылыққа деген сүйіспеншілікті арттырары анық.

ҚМДБ Қарағанды облысы өкілдігінің баспасөз қызметі