«Әл Машани» мешіті мен Үштөбе ауылындағы «Қажыбай қажы» мешітінің әйел-қыздар жамағаты қасиетті Рамазан айымен тұспа-тұс келген Наурыз мейрамын «Рамазанда келген Әз-Наурыз» атты рухани-танымдық іс-шарамен атап өтті. Кеш соңында ауызашар дастарханы жайылып, жамағат бірлік пен берекенің лебін сезінді.

Іс-шараға «Қажыбай қажы» мешітінің ұстазы Гүлнұр Қаныбекқызы мұрындық болып, екі мешіттің әйел-қыздар қауымын біріктірді. Рухани кеште қазақтың салт-дәстүрі дәріптеліп, ұлттық құндылықтар насихатталды. Қыз-келіншектер арасында түрлі сайыстар ұйымдастырылды. Жас қыздар діни сұрақтарға жауап беруден жарысса, келіншектер нан илеп, кесу шеберлігін көрсетті. Ал әжелер ұршық иіруден сайысқа түсті.

Барлық қатысушыларға ынталандыру сыйлықтары табысталды.

Ұстаз Гүлнұр Қаныбекқызы сабыр тақырыбында әсерлі уағыз айтып, мұсылман үшін сабырдың барлық құлшылықтар мен сынақтарда аса маңызды екенін тілге тиек етті. Ол мұсылманның болмысындағы сабырлылық – шынайы рухани жетістік екенін атап өтті. Сонымен қатар «Қажыбай қажы» мешітінің ұстазы Мариям Бауыржанқызы садақа жайлы уағыз айтып, қиналған жандарға, мүсәпірге көмектесуге шақырды. 

Кеш соңында ұлттық нақышта киінген үш шәкірт ерекше аталып, арнайы сыйлықтармен марапатталды.

ҚМДБ Қарағанды облысы өкілдігінің баспасөз қызметі