ҚМДБ Төрағасы, Бас мүфти Наурызбай қажы Тағанұлының тапсырмасына орай Рамазан айы бойы қарилар жамағатпен бірге Құран хатым оқып, әр түн сайын тарауық намазын жүргізді. Бұл игі амал ата-бабаларымыздың – хандар мен би-батырлардың, ел қорғаған ерлердің рухына арналды.

Кеш бойы Аллаға тәубе етіп, тарауық және нәпіл намаздарын оқып, кешірім сұраған жамағат қасиетті Құран аяттарын тыңдап, жүректерін иман нұрымен суарды. Игілік пен үмітке толы бұл кеш рухани әсерімен есте қалды. Жамағатпен бірге құлшылық жасап, Жаратқаннан жарылқау тілеу – әрбір мұсылман үшін үлкен нығметке айналды.

Қадір түнінде Қарағанды облысының бас имамы Естай Айтуғанұлы хатым дұғасын жасап, ақсақалдар бата берді. Дұғада еліміздің тыныштығы, халқымыздың амандығы, дініміздің өркендеуі үшін Алладан медет сұралды. Сонымен қатар, «Рамазан айында жүктелген аманаттарды абыроймен атқарып, келесі қасиетті оразаға аман-есен жетуді Алла нәсіп етсін» деген ізгі тілек айтылды.