Қасиетті Рамазан айының құрметіне орай Қарағанды қалалық «Әл-Машани» мешітінде ұстаз Гүлнұр Қаныбекқызының ұйымдастыруымен «Құран – мәңгі мұғжиза» атты шәкірттер арасында Құранның «Дұха» мен «Нәс» сүрелерін жатқа оқудан сайыс өтті.

Игі іс-шараға Қарағанды қалалық «Әнет баба» мешітінің ұстазы, Әйел-қыздар секторының жетекшісі Әйгерім Берікболқызы, сондай-ақ «Әл-Машани» және «Қажыбай қажы» мешіттерінің ұстазы Гүлнұр Қаныбекқызы қазылық етті.

Құран сайысы жоғары деңгейде өтіп, қатысушылар өз білімдері мен жаттау қабілеттерін паш етті. Сайыс қорытындысы бойынша:

• І орын – Ұзақбай Айман (20 000 ₸)

• ІІ орын – Мұратова Әйгерім (15 000 ₸)

• ІІІ орын – Икенова Жұлдызай (10 000 ₸)

Жүлделі орындарға ие болған шәкірттер марапатталып, барлық қатысушыға ынталандыру сыйлықтары мен мадақтамалар табысталды. Сонымен қатар сайысқа келген көрермендерге викториналық сұрақтар ойнатылып, түрлі сыйлықтар үлестірілді.

Пайғамбарымыздан (с.ғ.с) жеткен хадисте:
«Қиямет күні Құран келіп: “Я, Алла, Құран оқушыны көріктендір”, – дейді, сонда оған қошемет тәжі кигізіледі. Содан кейін Құран: “Я, Алла, одан сайын еселе”, – дейді, сонда оған қошемет киімі кигізіледі. Кейін Құран: “Я, Алла, оған разы бол”, – дейді, сонда оған разылығы беріледі. Содан соң Құран оқушыға: “Оқы және биіктей түс”, – делінеді. Ол оқыған әрбір аятқа сауап жазылады» (Тирмизи).

Алла Тағала баршамызды Құранның шапағатымен екі дүние бақытына бөлесін!

ҚМДБ Қарағанды облысы өкілдігінің баспасөз қызметі