Қасиетті Қадір түні Қарағанды облысы Нұра аудандық мешітінде Құран хатымы аяқталып, ауданның бас имамы Ерлан Серікұлы хатым дұғасын жасады. Жүздеген жамағат қол жайып, Аллаға жалбарынып, Рамазанның қасиетті кешінен рухани әсер алды.

Рамазан айы бойы Нұра аудандық мешітінде тарауих намазын жүргізіп, Құранды толық оқып шыққан қариларға құрмет көрсетілді. Биыл Нұра халқына Құран үнін жеткізу үшін арнайы екі қари шақырылған болатын. Олар әуезді мақамымен жүректерге рухани нәр беріп, жамағаттың ықыласына бөленді.

Хатым дұғасынан соң аудан имамы Ерлан Серікұлы жамағат атынан қариларға алғыс білдіріп, мешіт ақсақалдары қазақы дәстүрге сай иықтарына шапан жапты. Сонымен қатар көпшіліктің атынан қаржылай сыйлық пен «Умра қажылығы» табысталды.

ҚМДБ Қарағанды облысы өкілдігінің баспасөз қызметі