Хақ Тағаланың қалауымен күллі мұсылман қауымы 30 күн бойы сабырмен ораза ұстап, Ораза айт мерекесін аман-есен қарсы алуы – зор қуаныш әрі ерекше нығмет. Расында, әрбір мұсылман баласы үшін Айт мейрамының орны бөлек, рухани әрі жүрекке жақын мереке екені сөзсіз. Осыған орай Нұра аудандық мешіті ұлттық құндылықтарымызды дәріптей отырып, 12 айда бір келетін қасиетті мейрамның алғашқы күнін ерекше көңіл күймен атап өтті.

Айт намазының алдында аудандық мешіттің бас имамы Ерлан Серікұлы жиналған жұртшылықты ұлық мейраммен құттықтап, дінімізге қуат, елімізге тыныштық тіледі. Ақжарма тілегін арнағаннан кейін имам жамағатты мерекелік іс-шаралар бағдарламасымен таныстырып, барша жұртты мешіт ауласындағы думанды мерекеге шақырды. Қазыналы ақсақалдар мен ақ жаулықты аналар ақ дастарханға шақырылып, құрметке бөленді.

Мерекелік іс-шара аясында ұлттық ойындардан жарыстар ұйымдастырылды. Жаппай көкпар, садақ ату, арқан тарту сынды ойындарда жігіттер топ-топқа бөлініп, өзара күш сынасты. Гір тасын көтеруде де кіл мықтылар анықталды. Айт мерекесіне ерекше үлес қосқан азаматтарға аудан имамы алғыс айтты.

Халық бар ынта-ықыласымен қатысушыларға қолдау білдіріп, дүбірлі думанның көтеріңкі рухын сезінді.

ҚМДБ Қарағанды облысы өкілдігінің баспасөз қызметі