Ораза айт мейрамында ҚМДБ Төрағасы, Бас мүфти Наурызбай қажы Тағанұлының бастамасымен, Қарағанды облысы өкілдігі қазақ күресін ұйымдастырды.

Мерекелік спорт сайыстарының ішіндегі көпшілік асыға күткен, көрермен қызу қолдаған жарыс – қазақ күресі болды. Бұл ұлттық өнерге деген ықылас ерекше байқалып, боз кілем маңына топтасқан халық әр балуанның қимылына ерекше мән беріп, демеу көрсетіп отырды. Айт күніндегі бұл тартысты дода – сынға түскен балуанның күшін, ептілігін, сабырын сынаған сайысқа айналды.

82 кг. дейінгі салмақта өткен күреске 60 балуан қатысты. «Ұрыста тұрыс»,- жоқ деп, әр балуан өзінің шебер меңгерген әдістерін қолданып, қарсыласынан әдіс-айласын асыруға тырысты. Белдесулер тартысты өтіп, көрермендердің де делебесін қоздырды. Әсіресе, жартылай финал мен ақтық сын көпшіліктің назарын ерекше аударды.

Жарыс қорытындысында жеңімпаздар анықталып, жүлделер табысталды:

▪ 1-орын – Қайырғали Төлепберген – жарыста жүйрік тұлпар мініп, ел қошеметіне бөленді. Оның боз кілем үстінде қолданған әдіс-амалдары мен  көрермен мен қазылар алқасының көңілінен шықты.

▪ 2-орын – Мәуленин Әбілхайыр – 200 000 теңге қаржылай жүлдеге ие болды.

▪ 3-орын – Қолдасов Нұрбек – 100 000 теңге ұтып алды.

▪ «Көрермен көзайымы» номинациясы бойынша Қожин Мәуленге 50 000 теңге табысталды. Оның күреске деген ынтасы мен қайсар мінезі көпшілікті тәнті етті.

Қазақ күресі – ұлт рухын оятатын, ер жігіттің жігерін шыңдайтын өнер. Бұл жарысты өткізуде негізінен  жастарды ұлттық өнерге, спортқа тарту мақсаты көзделген. Жеңімпаздарға берілген тұлпар мен ақшалай сыйлықтар – ұлттық мұрамызға деген құрмет пен қолдаудың жарқын көрінісі болды.