«Жыржыс қажы» мешітінде суицидтің алдын алу және стреске төзімділік тақырыбында насихат жүргізілді

Қарағанды облысы, Бұқар Жырау ауданына қарасты «Жыржыс қажы» мешітінде жастармен тәрбиелік бағыттағы іс-шара өтті. Іс-шара барысында мешіттің имамы Рүстем Мұратұлы «Суицид профилактикасы» және «Жастар арасында стреске төзімділік» тақырыбында насихат айтты.

Қазіргі қоғамда белең алып отырған өзекті мәселелердің бірі – өз-өзіне қол жұмсау фактілерінің алдын алу мақсатында имам жамағатқа жан сақтау мен сабырдың маңыздылығы жайында түсіндіру жұмыстарын жүргізді.

– Адам өмірі – Алланың берген аманаты. Қиындық пен сынақ – өмірдің бір бөлшегі. Сабырлы болу, қиындықтан шығу жолын іздеу – мұсылманға тән қасиет, – деді Рүстем Мұратұлы.

Кездесу барысында имам жастардың сұрақтарына жауап беріп, оларға өмірлік бағыт-бағдар беретін өнегелі ойларымен бөлісті.

Іс-шара соңында қатысушыларға имандылық пен рухани құндылықтарды нығайту туралы кеңестер айтылып, дұға жасалды.

ҚМДБ Қарағанды облыстық өкілдігінің баспасөз қызметі