Қарағанды облысының бас имамы Естай Айтуғанұлы мен облыстық мешіттің наиб имамы Асылхан Нұртайұлы Алматы қаласындағы Нұр-Мүбарак университетіне арнайы іссапармен барып, аталмыш оқу ордасында білім алып жатқан шәкірттермен кездесті.

Кездесу барысында облыстың бас имамы болашақ дін қызметкерлеріне ағалық ақыл-кеңесін айтып, келелі жиын өткізді. Естай Айтуғанұлы жастарға имандылықтың, білімнің, адалдық пен жауапкершіліктің маңызы жайында өнегелі насихат жүргізді. Сонымен қатар болашақта діни қызмет жолында кездесетін қиындықтарға төтеп берудің жолдарын түсіндіріп, білім мен ізденістің өмірлік серік болуға тиіс екенін атап өтті.

Жиын барысында бас имам студентерден қандай мәселелер барын сұрап, пікіралмасты. Сондай-ақ бас жастардың әр сұрағына жеке тоқталып, жан-жақты жауап берді. Ашық пікір алмасу форматында өткен кездесу студенттер үшін рухани серпіліс болды.

Кездесу соңында Естай Айтуғанұлы биыл оқуын аяқтайтын түлектерді Қарағанды өңірінде діни салада қызмет атқаруға шақырып, ел игілігіне еңбек етудің сауабы мен жауапкершілігі жайында айтты. Сонымен қатар дін жолында адал қызмет етуді ниет еткен жастарға ақ батасын беріп, қаржылай қолдау көрсетті.

ҚМДБ Қарағанды облысы өкілдігінің баспасөз қызметі