Қарағанды қалалық «Қазыбек би» мешітінің ұстазы Асыл Көкешұлы Қарағанды медицина университетінің (ҚМУ) студенттерімен кездесу өткізді. Жиын «Жастар ісі» секторы аясында ұйымдастырылды.

Кездесу барысында ұстаз жастарға «Суицид профилактикасы» және «Жастар арасында стреске төзімділік» тақырыптарында насихат айтып, қиындықпен бетпе-бет келгенде дінге, сабырға және үмітке сүйенудің маңызын түсіндірді.

Асыл Көкешұлы өз-өзіне қол жұмсау (суицид) – Ислам дінінде ауыр күнә саналатынын нақты аят-хадистермен дәлелдеп, өмірге құндылықпен қарауға шақырды. Сонымен қатар, өмір сынақтарынан сүрінбей өту үшін рухани дайындық пен жаман ойлардан арылудың жолдарын ұсынды.

Кездесу жастарға рухани қолдау мен мотивация беріп, ашық пікір алмасуға ұласты.

ҚМДБ Қарағанды облысы өкілдігінің баспасөз қызметі