Қарағанды қалалық «Әл-Ғаффар» мешітінің имамы Ермахан Оралбайдың ұйымдастыруымен мешіт ұстазы Азамат Төлеухан Восток-2 ықшам ауданында орналасқан «InLife» емханасында «Діни экстремизм, терроризм – бейбітшілік пен тұрақтылыққа төнген қауіп» тақырыбында ақпараттық-түсіндіру жұмысын жүргізді.

«Ауырып ем іздегенше, ауырмайтын жол ізде» деген халық даналығы – барлық салада сақтыққа үндейтін ұран. Қазіргі жаһандану кезеңінде радикализм мен экстремизм секілді қауіп-қатерлер әлемнің көптеген елдеріне қатер төндіріп отыр. Кеңестік жүйеден шыққан, идеологиялық тұрғыдан қалыптасып үлгермеген еліміз үшін де бұл жат ағымдар тосыннан келген індет іспеттес.

Қоғамда дінге бет бұрған жандардың қатары күн санап артып келеді. Алайда діндарлықты әсіре діншілдікпен шатастырып, имандылықты адасушылыққа айналдырып алған азаматтар да кездесуде.

Аталған кездесуде мешіт ұстазы Азамат Төлеухан теріс ағымдардың белгілері мен зардаптарын түсіндіріп, тек ескерту ғана емес, сол ағымның жетегіне еріп кеткен азаматтарды қоғамға қайта бейімдеу маңызды екенін атап өтті. «Олар өздерін адасушылармыз деп санамайды, сондықтан оларға сабырмен, біліммен, түсіністікпен жол табуымыз керек» – деді ұстаз.

ҚМДБ Қарағанды облысы өкілдігінің баспасөз қызметі