ҚМДБ Төрағасы, Бас мүфти Наурызбай қажы Тағанұлының бастамасымен Қарағанды облысының Саран қаласына қарасты Ақтас кентінде «Ерімбет ата» мешіті салтанатты түрде ашылды.

Алланың жердегі үйі саналатын бұл мешіттің құрылысы 2019 жылы жергілікті азаматтардың қолдауымен басталған. Игі іске Ерімбет атаның ұрпақтары да атсалысты. Қазіргі таңда мешітке 350 адам қатар тұрып намаз оқи алады. Екі қабатты мешіттің аумағы — 10 гектар, биіктігі — 20 метр. Бірінші қабатта ерлер жамағаты мен әйелдер жамағатына арналған намазхана және 100 адамға арналған асхана орналасқан.Демеушілер мешітке қызметтік көлік сыйлады.

Жаңа мешітке имам ретінде Ерғазы Азамат Сайлауұлы тағайындалып, қызметіне кірісті.  

Салтанатты ашылу рәсіміне қатысқан Қарағанды облысының бас имамы Алла үйіне Мүфтият баспасынан жарық көрген 100 дана діни кітапты тарту етті. Сонымен қатар мешіттің құрылыс жұмыстарына белсене атсалысқан азаматтарға алғыс хат табыстап, шапан жапты.

Алдағы уақытта «Ерімбет ата» мешітінде балаларды оқыту, жамағатқа қажетті рухани бағыттағы түрлі игі істерді жүзеге асыру жоспарланып отыр.

ҚМДБ Қарағанды облысы өкілдігінің баспасөз қызметі