Қарағанды қалалық «Бала қажы» мешітінде «Қызға қырық үйден тыйым» тақырыбында тағылымды дөңгелек үстел өтті. Іс-шараға әйел жамағаты мен ақ жаулықты аналар қатысып, ұлттық тәрбие мен әйел затының қоғамдағы орны жөнінде кеңінен пікір алмасты.

Бір дастархан басында өткен сырлы сұхбатта апаларымыз өмірлік тәжірибесімен бөлісіп, әр шаңырақтың ұйытқысы саналатын әйел-ананың көркем мінезі, ибалылығы, инабаттылығы жөнінде тағылымды ой қозғады. Ата-бабадан жалғасқан «қыз баланың тәрбиесіне қырық үйдің ортақ жауапты болуы» секілді ұлағатты ұғымдардың бүгінгі қоғам үшін де маңыздылығы атап өтілді.

Жиын барысында әйел затының табиғатына тән нәзіктікті сақтау, оны әдеп-ғұрыпқа сай тәрбиелеудің жолдары кеңінен талқыланды. Сондай-ақ, бұл бағыттағы насихатты күшейту қажеттігі айтылып, осындай басқосулардың тәрбиелік мәні жоғары екені атап өтілді.

«Әжелер мектебі» осылайша ұлттық құндылықтарды ұлықтау бағытында маңызды бастамалар көтеріп, жас буынға бағыт-бағдар беруде. Мешітімізде тұрақты түрде ұйымдастырылатын ақпараттық және насихаттық кездесулер салт-дәстүрімізді жаңғыртып, рухани жаңаруға жол ашып келеді.

ҚМДБ Қарағанды облысы өкілдігінің баспасөз қызметі