«Әл-Машани» мешітінің әйел-қыздар жамағаты бір күнде Құранды толық оқып, хатым дұғасын жасады. Қасиетті Құранды бастан-аяқ оқып, оны Алланың үйі – мешітте тәмамдау үшін жиналған шәкірттер ізгі амалдарын дұғамен түйіндеді.

Хатым соңында мешіт ұстазы Гүлнұр Қаныбекқызы дұға жасап, бұл сауапты амалдың сауабын дүниеден өткен ата-бабаларға бағыштап, еліміздің амандығы мен әлемдегі мұсылмандардың тыныштығы үшін тілек тіледі.

Алла елшісі Мұхаммед пайғамбар (оған Алланың салауаты мен сәлемі болсын) бір хадисінде былай деген:
«Алланың үйлерінің бірінде жиналып, Алланың кітабын оқыған және оны бір-біріне үйреткен қауымға тыныштық беріледі, рақым етіледі, оларды періштелер қоршап алады және Алла Тағала оларды Өзінің қасындағы жандардың арасында еске алады» (Мүслим).

Қасиетті Құранмен сусындаған күн – жамағат жадында рухани қуат пен имани ләззат сыйлаған күн болып қалды.

ҚМДБ Қарағанды облысы өкілдігінің баспасөз қызметі