Ислам дініндегі бауырмалдық – Алла Тағаланың ықыласты, тақуа құлдарының жүрегіне дарытатын иләһи нығметі. Бұл қасиет мұсылман қауымын бірлік пен ынтымаққа бастап, олардың арасында өзара сүйіспеншілік пен жанашырлықтың орнауына себеп болады.

Осыған орай «Әл-Машани» мешітінде әйел-қыздар жамағатына арналған діни насихат жиыны ұйымдастырылды. Уағыз барысында мешіт ұстазы Гүлнұр ханым жамағатқа бауырмалдықтың маңызы мен шынайы мұсылманның сипаттары жайында әсерлі насихат айтты. Ол өз сөзінде Құран мен хадистерден мысалдар келтіре отырып, әрбір мұсылманның өз бауырына мейірімді, кешірімді әрі жанашыр болуы – иманның кемел белгісі екенін атап өтті.

Алла Тағала Құран кәрімде былай дейді:

﴿وَأَلَّفَ بَيْنَ قُلُوبِهِمْ ۚ لَوْ أَنفَقْتَ مَا فِي الْأَرْضِ جَمِيعًا مَّا أَلَّفْتَ بَيْنَ قُلُوبِهِمْ وَلَـٰكِنَّ اللَّهَ أَلَّفَ بَيْنَهُمْ ۚ إِنَّهُ عَزِيزٌ حَكِيمٌ﴾
«Алла олардың жүректерін жарастырды. Сен жер бетіндегі барлық байлықты жұмсасаң да, олардың жүректерін дәл бұлай жарастыра алмас едің. Бірақ Алла оларды жарастырды. Расында Ол – ұлы да үстем, аса дана»
(Әнфәл сүресі, 63-аят)

Сондай-ақ, Пайғамбарымыз Мұхаммед ﷺ көптеген хадистерінде мұсылмандарды бірлік пен ынтымаққа үндеп, алауыздық пен жікке бөлінуге тыйым салған. Осындай рухани тәлімдерге сүйене отырып, ұстаз Гүлнұр шәкірттерін өзара бауырмал әрі жанашыр болуға, бір-бірін Алла разылығы үшін жақсы көруге шақырды.

ҚМДБ Қарағанды облысы өкілдігінің баспасөз қызметі