Қарағанды облысы, Саран қалалық мешітінің ұйымдастыруымен «Саран зираты» атындағы қорымда тазалық жұмыстары жүргізілді. Бұл игі іс ҚМДБ Төрағасы, Бас мүфти Наурызбай қажы Тағанұлының бастамасымен қолға алынған «Өткенге құрмет, тіріге міндет» атты сенбілік аясында жүзеге асты.

Саран мешітінің имамы Мұсабеков Нұржігіт Оразалыұлының ұйытқы болуымен өткен тазалық шарасына қаламыздағы дін қызметкерлері, мешіт жамағаты, шәкірттер мен еріктілер белсене атсалысып, арнайы техника тартылды.

Көктем мезгілінде дәстүрге айналған бұл игі рәсім — ата-баба рухына тағзым етудің және кейінгі ұрпаққа үлгі боларлық өнегені насихаттаудың жарқын көрінісі. Қорым маңы қоқыстан тазартылып, аумағы көркейтілді.

«Тазалық – иманның жартысы» деген Пайғамбарымыздың (с.ғ.с.) хадисін басшылыққа алған жамағат сауапты іске ортақтасып, бірлік пен жанашырлықтың үлгісін көрсетті.

ҚМДБ Қарағанды облысы өкілдігінің баспасөз қызметі