Қарағанды облысы, Шахтинск қаласындағы «Нұр» мешітінде имам Мәулен Әбілхайыр Кәсенұлының ұйымдастыруымен «Құран және тәжуид» курсы басталды. Бұл игі бастама қасиетті Құран Кәрімді дұрыс оқып-үйренгісі келген жамағат үшін зор мүмкіндік болып отыр.

Аталмыш курстың негізгі мақсаты – Құран оқудағы қателіктерді түзету, тәжуид ережелерін үйрету, сондай-ақ Алланың Кәләмін жүрекпен түсініп, санамен ұғынуға бағыттау. Сабақ барысында тәжуидтің теориялық қағидалары мен практикалық жаттығулар қатар жүргізілуде. Қатысушылар әріптердің махражы мен сипаттарын, оқудағы үкімдерді, вакф пен васл ережелерін, сондай-ақ Құран оқудағы әдептерді үйрену үстінде..

Имам Мәулен Кәсенұлының айтуынша:
«Құран – мұсылманның өмірлік жол сілтеушісі. Оны дұрыс оқып, мағынасына терең бойлау – әрбір мұсылманның міндеті. Бұл курстың басты мақсаты – Құранмен өмір сүруге қадам басу», – дейді ол.

Курсқа жас та, кәрі де қатысып, рухани білімге сусындап жатыр. Алдағы уақытта оқуын аяқтаған қатысушыларға арнайы сертификат табысталып, үздік оқушылар марапатталмақ.

Жамағаттың белсенділігі мен ықыласы бұл игі істің берекелі екенін аңғартады. Құранмен сусындаған жүректер нұрланып, Алланың разылығына жетер жолда қадам басып келеді. 

ҚМДБ Қарағанды облысы өкілдігінің баспасөз қызметі