Бүгінде суицид жағдайы қоғам үшін күрделі әрі алаңдатарлық мәселе болып отыр. Өкінішке қарай, бұл қауіпті дерт көбінесе оң-солын танып үлгермеген жастардың арасында кездесіп, қайғылы жағдайлармен аяқталуда.

Осы олқылықтың алдын алу мақсатында Қарағанды облысы, Нұра аудандық мешітінің имамы Ерлан Серікұлы көп салалы Болат Әбдікәрімов атындағы колледждің студенттеріне арнайы насихат жұмыстарын жүргізді.

«Суицид профилактикасы» және «Жастар арасында стресске төзімділік» тақырыптарында өткен кездесу барысында имам Ерлан Серікұлы жастарға өз-өзіне қол жұмсаудың ислам дініндегі үкімі туралы кеңінен түсіндірді. Ол уағызында: «Өз-өзіне қол жұмсау – ислам шариғатында ауыр күнә болып саналады. Өйткені бұл — Жаратқанның тағдырына қарсы шығумен тең іс» екенін атап өтті.

Сондай-ақ, Ниса сүресінің 29-30-аяттарын мысалға келтіріп: «Өз-өздеріңді өлтірмеңдер. Расында, Алла сендерге ерекше мейірімді. Ал кімде-кім дұшпандықпен, зұлымдықпен солай істейтін болса, Біз оны тозақта өртейміз. Бұл Алла үшін жеңіл іс» деген аяттардың мән-мағынасын тарқатып түсіндірді.

Іс-шара барысында жастарға стресстік жағдайларда сабыр сақтау, қиындықтарды жеңудің діни әрі рухани жолдары жан-жақты түсіндірілді.

ҚМДБ Қарағанды облысы өкілдігінің баспасөз қызметі.