«Әл Ғаффар» мешіті әйел-қыздар жамағатының ұйымдастыруымен Құранды жүзінен сауатты оқып үйренген шәкірттерге арналған «Құранмен нұрланған жүректер» атты рухани кеш өтті.

Кеш барысында шәкірттерге арнайы сертификат табысталып, тәж кигізілді. Игі іс-шара мешіттің бас имамы Оралбай Ермахан Әділбекұлының Құран мен білімге қатысты уағыз-насихатымен басталды. Имам өз сөзінде Құранның алғашқы түскен аяты «Оқы!» деген бұйрық сөз екенін атап өтіп, ислам діні адамның білім алуы мен ғылымға ұмтылуын парыз еткенін жеткізді. Сонымен қатар Зумар сүресінің 9-аятын мысалға келтіріп: «Білетіндер мен білмейтіндер тең бе?» деген Құран үкімі арқылы білімнің артықшылығы мен маңызын түсіндірді.

Рухани кешке 42 адам қатысып, 26 шәкіртке тәж кигізілді. Сонымен қатар «Әл Машани» мешітінің ұстазы Бахытгүл Айтқалиқызы өнегелі насихат айтып, жамағатқа жүрекке жетерлік тағылымды ойлар айтты.

ҚМДБ Қарағанды облысы өкілдігінің баспасөз қызметі