Қарағанды қалалық «Төлеутай ата» мешітінің имамы Рауан Төлеубекұлының ұйымдастыруымен «Таза Қазақстан» жобасы аясында мешіт ауласына шырша ағаштары отырғызылды.

Қазақта «Атадан мал қалғанша, тал қалсын» деген аталы сөз бар. Дінімізде де ағаш егу – сауапты амал саналады. Осы сауапты іске мешіттің имамы өзі бастамашы болып, дін қызметкерлері мен жамағат түгелдей атсалысты.

Жер тоңы жібіп, көктемнің шырайлы сәтінде жас шыбық қадап, тал егу – табиғатты көркейтуге бағытталған игі қадам. Мұндай жұмыстар мешіт ауласын абаттандырумен қатар, жамағат арасында экологиялық мәдениетті қалыптастыруға да әсер етеді.

Іс-шара соңында имам Рауан Төлеубекұлы тал егуге үлес қосқан барша жамағатқа ризашылығын білдіріп, сауапты істің қабыл болуын тілеп, бата берді.

ҚМДБ Қарағанды облысы өкілдігінің баспасөз қызметі