«Әл-Машани» және «Қажыбай қажы» мешіттерінің Құран жаттаушы шәкірттері рухани басқосуда кездесіп, жаттаған сүрелерін өзара толықтай қайталады. Бұл — Құран жаттауға ниеттенген жастар үшін үлкен жігер мен шабыт беретін тағылымды жүздесу болды.

Алла Тағала Құран Кәрімде былай дейді:

«Расында, сендерге Алла тарапынан нұр және ашық кітап келді. Сол арқылы Алла тағала Өзінің разылығына ілескендерді амандық жолдарына салады және Өз нұсқауымен оларды қараңғылықтан нұрға шығарады әрі тура жолға салады»
(«Маида» сүресі, 15-16-аяттар)

Сондай-ақ Пайғамбарымыз Мұхаммед (оған Алланың салауаты мен сәлемі болсын) хадисінде:

خَيْرُكُمْ مَنْ تَعَلّمَ الْقُرأنَ وَ عَلَّمَهُ
«Сендердің ең жақсыларың – Құранды үйреніп, оны үйреткендерің»,
– деп насихаттаған (Бұхари, Әбу Дәуіт, Тирмизи риуаяты).

Құран – адамды көркем мінезге тәрбиелейтін, қоғамды ізгілік пен әділет жолына бастайтын қасиетті кітап. Оны жаттап, жүрекке орнықтыру – Алланың ерекше сыйы. Ел ішінде Құран жаттаушылар неғұрлым көбейсе, соғұрлым қоғамда береке мен руханият артады.

Алла Тағала елімізге Құранды жаттаған, оны амалға айналдырған салиқалы ұрпақ нәсіп етсін.

ҚМДБ - Қарағанды облысы өкілдігінің баспасөз қызметі