Қарағанды облысы, Теміртау қаласындағы «Әлихан Бөкейхан» мешітінің имамы Ақниет Сәлімбайұлының бастамасымен 2025 жылғы 9 мамыр — Жеңіс күніне орай елін сүйген ерлер мен тыл еңбеккерлерінің рухына тағзым жасалып, ерекше рухани іс-шара ұйымдастырылды.

Игі іс-шара аясында мешіт қызметкерлері мен жамағат тылда ерен еңбек еткен қарттарымыз — Абдиманов Уалихан ата мен Абдиманова Панария әжеміздің шаңырағына арнайы барып, құрмет көрсетті. Қасиетті Құран аяттарын оқып, ақсақалдарымызға сый-сияпат ұсынып, баталарын алды.

Абдиманов Уалихан мен Абдиманова Панария — 1941 жылғы 22 маусым мен 1945 жылғы 9 мамыр аралығында майдан үшін еңбек етіп, Ұлы Жеңіске үлес қосқан тыл ардагерлері. Соғыстың ауыр салмағын иықтарымен көтерген бұл жандар — халқымыздың тірі шежіресі, елге адал қызмет еткен алтын буын өкілдері.

Осындай тағылымды кездесулер жас ұрпаққа өнеге болып, аманатқа адалдықтың, өткенге құрметтің, тіріге ізеттілік пен бақилық болғандарға дұға жасаудың маңызын ұғындырып келеді.

ҚМДБ Қарағанды облысы өкілдігінің баспасөз қызметі