Қарағанды облысы, Теміртау қаласындағы «Әлихан Бөкейхан» мешітінің имамы Ақниет Сәлімбайұлының ұйымдастыруымен 9 мамыр — Жеңіс күніне орай ел үшін жанын қиған боздақтар мен Ұлы Отан соғысында шейіт болған батырлардың рухына арналып хатым Құран дұғасы жасалды.

Тағылымды іс-шара барысында қасиетті Құран аяттары оқылып, жамағат болып дұға жасалды. Соғыс жылдарында қайсарлық пен ерлік танытқан майдангерлердің ерлігі еске алынып, елінің болашағы үшін жанын пида еткен марқұмдардың рухына сауапты дұғалар бағышталды. Сондай-ақ олардың артында қалған ұрпақтарына иман мен амандық тілеген жүрекжарды тілектер айтылды.

Ақниет Сәлімбайұлының бұл рухани бастамасы — өшпес ерлікке тағзым етудің, өткенге құрметтің және ұрпаққа өнеге боларлық рухани тәрбиенің көркем үлгісі ретінде жамағат тарапынан ерекше ықыласпен қабылданды.

ҚМДБ Қарағанды облысы өкілдігінің баспасөз қызметі