Жеңіс күнінің 80 жылдығына орай, Қарағанды қаласындағы «Әл-Ғаффар» мешітінің бас имамы Ермахан Оралбай тыл ардагерлері Ахметов Жұмаш пен Бекбосынов Қапан ақсақалдың шаңырағына арнайы барып, зиярат етті. Сондай ақ 30 жылға жуық уақытын дін қызметіне арнаған, жақында ғана өмірден өткен Дархан Асылтайұлы қажының отбасына барып, Құран бағыштап, көңіл айтты.

Зиярат барысында бас имам қариялардың хал-жағдайын сұрап, елге сіңірген еңбектері үшін алғыс білдірді. Ермахан Оралбай имам:
«Сіздердің соғыс жылдарындағы жанқиярлық еңбектеріңіз – бүгінгі бейбіт өміріміздің іргетасы. Алла тағала бұл амалды қабыл етіп, дендеріңізге саулық, шаңырақтарыңызға береке берсін. Сіздерге қарап біз ұрпақ тәрбиелейміз, елге қызмет етеміз», – деп жүрекжарды лебізін білдірді.

Игі іс-шара барысында ардагерлерге естелік сый-сияпаттар тарту етілді. Қариялар дін қызметкерлеріне ризашылығын білдіріп, ақ баталарын берді.

ҚМДБ қарағанды облысы өкілдігінің баспасөз қызметі