Қарағанды облысы, Шахтинск қаласындағы «Нұр» мешітінің ұйымдастыруымен 9 мамыр – Ұлы Жеңіс күніне 80 жыл толуына орай тағылымды іс-шара өтті. Мешіттің имамы Мәулен Әбілхайыр Кәсенұлының бастамасымен соғыс ардагерінің жұбайы, 90 жастағы Шаймерденова Биғайша әжеге құрмет көрсетілді.

Бүгінгі бейбіт өмір үшін от пен оқтың ортасында жанын қиған ардагерлерге деген шынайы алғыс – кейінгі ұрпақтың қасиетті борышы. Осы мақсатта мешіт ұжымы мен қала ақсақалдары Биғайша әженің шаңырағына арнайы барып, мерекемен құттықтап, сый-сияпат табыстады.

Құран оқылып, ардагерлер рухына дұға бағышталды. Мешіт имамы Әбілхайыр Кәсенұлы ізгі тілегін жеткізіп, ақсақалдар ақ батасын берді. Биғайша әже де ризашылықпен алғысын айтып, мешіт ұжымына ақ батасын берді.

Мұндай рухани іс-шаралар жас ұрпақтың жүрегіне өткен тарихты сіңіріп, үлкенге құрмет, кішіге ізет көрсетуге баулиды.

ҚМДБ Қарағанды облысы өкілдігінің баспасөз қызметі