Қарағанды облысына қарасты «Әл-Машани» мешітінде әйел-қыздар жамағатына арналған уағыз-насихат өткізілді. Кездесу барысында мешіт ұстазы Гүлнұр Қаныбекқызы «Бауырластықтың артықшылығы» тақырыбында мазмұнды уағыз айтып, дініміздегі бауырмалдықтың маңызын кеңінен түсіндірді.

Уағыз барысында бір-бірін Алла үшін жақсы көру, дін жолында бауыр болудың артықшылығы, мұсылмандар арасындағы рухани бауырластықтың берекесі кеңінен сөз болды. Бұл амалдардың Аллаға жақындататын сауапты істердің бірі екені айтылды.

Пайғамбарымыз Мұхаммедтің (Алланың оған игілігі мен сәлемі болсын) мына хадистері келтірілді:

«Екі мұсылман бауырдың бір-біріне жолыққандағы мысалы – бірін-бірі жуатын екі қолдың мысалы сияқты. Екі мүмін жолыққанда, Алла Тағала біріне екіншісі арқылы қайырлы істен пайдалануын нәсіп етеді.»

Сондай-ақ:

«Біреумен Алла үшін бауыр болған адамды Алла Тағала сондай бір дәрежеге көтереді, ол дәрежеге басқа ешқандай амалмен жете алмайды.»

Уағыз барысында жамағат арасында күнделікті қарым-қатынаста имандылықты сақтау, бауырластықты нығайту, шайтанның жаман ойынан арылу жолдары мен бауырмалдықтың шарттары да түсіндірілді.

Жиын соңында қатысушылар пайдалы насихат үшін алғыс білдіріп, рухани мазмұндағы кездесулердің жалғасуына ниет білдірді.

ҚМДБ Қарағанды облысы өкілдігінің баспасөз қызметі