Қарағанды қалалық «Төлеутай ата» мешітінің имамы Рауан Төлеубекұлы қаладағы Қарттар үйінде болып, көңілі қам жандарды зиярат етті.

Имам қарттармен жылы сұхбат құрып, олардың күнделікті тіршілігімен танысты. Кездесу барысында «Алланың разылығы – ата-ананың разылығында» екенін еске салған Рауан Төлеубекұлы үлкенге құрмет көрсету, қызмет қылу, көркем қарым-қатынаста болу арқылы батасын алудың – исламда да, қазақ халқының дүниетанымында да сауапты амал екенін атап өтті.

Сонымен қатар мешіт атынан қарияларға арнайы дайындалған жеміс-жидек себеттерін сыйға тартты. Осынау ата-әжелерге қамқорлық танытып, тұрақты көмек көрсетіп отырған мекеме қызметкерлеріне ризашылығын білдіріп, алғысын айтты.

ҚМДБ Қарағанды облысы өкілдігінің баспасөз қызметі