Аптаның әр бейсенбі күні берекелі дастархан басында бас қосуды үрдіске айналдырған Қарағанды қаласындағы «Қазыбек би» мешітінің жамағаты дәстүрлі рухани кеште тағы бір мәрте бас қосты.

Жамағаттың ауызбіршілігін арттырып, рухани тәрбие беруді көздеген кеш барысында мешіт жамағатына дастархан жайылып, ізгі насихаттар айтылды. Мешіттің наиб имамы Дастан Абдрахманов жиналған жамағатқа «Муннабихат» кітабы бойынша дәріс жүргізіп, діни тағылыммен бөлісті.

Сонымен қатар, қазіргі қоғамда кең етек жайып отырған жат ағымдардан сақтану, олардың алдын алу бағытында түсіндіру жұмыстары жүргізіліп, «Дәстүрлі дін құндылығы» тақырыбында насихат айтылды.

ҚМДБ Қарағанды облысы өкілдігінің баспасөз қызметі