Қарағанды қалалық «Төлеутай ата» мешітінде 31 мамыр — Саяси қуғын-сүргін және ашаршылық құрбандарын еске алу күніне орай мешіт ұжымы мен жамағаты Құран оқып, аруақтарға дұға бағыштады.

Мешіттің бас имамы Рауан Төлеубекұлы жамағатқа ел үшін жанын пида еткен бабаларымыздың ерлігі мен ерен еңбегі жайлы тағылымды уағыз айтып, былай деді:

«Біздің ұлт ретінде ұйысып, еңселі ел болып отырғанымыз — әуелі Алланың қамқорлығы, сосын кешегі ата-бабаларымыздың қайтпас қайсарлығы мен жанкешті ерлігінің арқасы. Басы айдауда, қолы кісенде жүргеннің өзінде елінің ертеңін ойлап, барын сарп еткен баһадүр бабаларымыздың рухына Алладан рақым тілейміз!» – деді.

Іс-шара соңында жамағатпен бірге Құран хатым дұғасы оқылып, сауабы қуғын-сүргін және ашаршылық құрбандарына бағышталды.

ҚМДБ Қарағанды облысы өкілдігінің баспасөз қызметі.