Қарағанды облысы, Абай аудандық орталық мешітінде жамағатқа ҚМДБ тарапынан әзірленген «Құдайы ас беруде ысырапқа жол бермеу» құжаты таныстырылды.

Насихат жұмыстарын мешіттің наиб имамы Есбол Оңал жүргізіп, бұл жағдайдың мазмұны мен маңыздылығына кеңінен тоқталды. Аталған құжат Қазақстан мұсылмандары діни басқармасының ұйымдастыруымен өткен имамдардың VI республикалық форумында қабылданғанын атап өтті.

Наиб имамның айтуынша, Құдайы ас – халқымыздың ұлттық дәстүрі мен Ислам дінінің негіздеріне сүйенетін сауапты амал. Марқұмның рухына Құран бағышталып, садақа ретінде берілетін ас – ел ішіндегі береке мен бірлікті күшейтетін рәсім. Алайда соңғы жылдары бұл дәстүр кейбір өңірлерде шынайы мәнінен алшақтап, ысырап пен бәсекеге айналып кеткен жайттар байқалып отыр.

«Бұл – ең алдымен қаралы үйге ауыр салмақ салып, шынайы ниеттің тазалығына сызат түсіретін жағдай. Осыны ескере отырып, еліміз бойынша бұл рәсімді біріздендіру, мәзірін оңтайландыру және шариғат талаптарына сай өткізу мақсатында арнайы құжат қабылданды» – деді имам.

Жиын барысында жамағат өкілдері де өз ойларын ортаға салып, қолдауларын білдірді.

ҚМДБ Қарағанды облысы өкілдігінің баспасөз қызметі