Қарағанды облысы, Саран қалалық мешітінде «Құдайы ас беруде ысырапқа жол бермеу» тұғырнамалық құжатының таныстырылымы өтті.

Аталған маңызды құжат жуырда Қазақстан мұсылмандары діни басқармасының төрағасы, Бас мүфти Наурызбай қажы Тағанұлы хазіретіміздің бастамасымен өткен Имамдар форумында қабылданған болатын. Ел мұсылмандары үшін өзекті саналатын бұл бастама – дәл осы Құдайы астағы ысырапты болдырмауға бағытталған тұғырнама.

Іс-шараға ҚМДБ-ның Қарағанды облысындағы «Әнет баба» мешітінің наиб имамы Хумар Қоныскерей, Саран қалалық мешітінің бас имамы Нұржігіт Мұсабеков, қала мешіттерінің дін қызметкерлері, зиялы қауым өкілдері мен ел ағалары қатысты.

Жиын қасиетті Құран аяттарының оқылуымен басталып, облыстың наиб имамы тұғырнаманың мазмұны мен мақсатын жамағатқа жан-жақты түсіндірді.

– Соңғы жылдары құдайы ас рәсімі кейбір өңірлерде шектен тыс ысырап пен бәсекеге ұласып кеткенін байқаймыз. Бұл жағдай қаралы үйге ауыртпалық салып қана қоймай, дініміздің қарапайымдылық пен сауап ниетіндегі талаптарына қайшы келеді. Сондықтан бұл рәсімді шариғат талаптарына сай біріздендіру, мәзірді қарапайым әрі адал тағамдармен шектеу, әсіресе жаназадан бұрын ас бермеу сияқты талаптар нақты көрсетілді, – деді наиб имам.

Жиын барысында сөз сөйлеген мешіт ақсақалдары да тұғырнаманың маңызын айта келе, қаралы үйде қазан аспауға, алыстан арнайы көңіл айтуға келген ағайын, туыс-жекжатқа мүмкіндігінше көршілері ас-су әзірлеп, қайғы жұтқан қаралы отбасыға қарасу қажет екенін тілге тиек етті. Сонымен қатар аталған құжаттың ел болашағы үшін маңызды бастама екенін атап өтті. Олар құжаттың халық арасында кеңінен насихатталып, жүзеге асуына қолдау білдіретіндерін жеткізді.

ҚМДБ Қарағанды облысы өкілдігінің баспасөз қызметі