2025 жылғы 6 маусымда, Құрбан айттың алғашқы күні, «Әл-Ғаффар» мешітінде қайырымдылық бағытындағы игі іс-шара жүзеге асты. Дәстүрге сай құрбан шалушы жамағаттан қабылданған құрбандық еті мен күнделікті тұтынуға қажетті негізгі азық-түлік түрлері әлеуметтік аз қамтылған отбасылар мен мұқтаж жандарға таратылды.

Іс-шара барысында мешіт қызметкерлері мен еріктілер алдын ала жасалған тізім бойынша көмекке мұқтаж азаматтарға құрбандық еті мен азық-түлік салынған пакеттерді үлестірді. Бұл – мешіт ұжымының қоғамдағы бауырмалдық пен жанашырлықты дәріптеуге бағытталған тұрақты бастамаларының бір көрінісі.

Құрбан айт – Алланың разылығы үшін құрбан шалынып, мұқтаждарға көмек көрсетілетін, мейірім мен ортақ қуанышқа шақыратын ұлық мереке. Осындай қайырымдылық істері – мұсылман қауымының рухани бірлігі мен өзара жанашырлығының жарқын белгісі.

Құрбандық – мейірім мен ортақ қуаныштың белгісі

ҚМДБ Қарағанды облысы өкілдігінің баспасөз қызметі