Қасиетті Құрбан айт мейрамының құрметіне Бұқар жырау ауданы, Үштөбе ауылында «Қажыбай қажы» мешітінің ұйымдастыруымен әйел-қыздар жамағатына арналған рухани басқосу өтті.

Жиын Құран аяттарының оқылуымен басталды. Мерекелік кеште мешіт ұстаздары Гүлнұр Қаныбекқызы мен Мәриям Қанат дайындаған арнайы бағдарлама бойынша шәкірттер түрлі танымдық ойындарға қатысып, тағылымды уағыз-насихат тыңдады. Сонымен қатар жамағатқа мерекелік сыйлықтар табысталды.

Мұндай игі жиындар – әйел-аналардың бірлігі мен парасатын нығайтып, рухани тәрбие мен имандылықты арттыратын құнды іс-шара.

Құрбан айт мейрамы – тек отбасылық қуаныш емес, бұл – жүректерді жақындастыратын, үмбет болып ұйысуға үндейтін, иман мен мейірімділікке жетелейтін берекелі мейрам. Осындай рухани басқосулар жиі өткізіліп, әйел-аналарымыздың үні мен өнегесі қоғамда жоғарылай бергей!

ҚМДБ Қарағанды облысы өкілдігінің баспасөз қызметі