Қарағанды облысы, Шахтинск қаласындағы «Нұр» мешітінде қасиетті жұма күнінің қарсаңында қуанышты оқиға орын алды. Сыған ұлтының бір азаматы жүрек қалауымен ислам дінін қабылдап, мұсылман атанды.

Діни рәсімді Шахтинск қалалық «Нұр» мешітінің бас имамы Мәулен Әбілхайыр Кәсенұлы жүргізіп, оған дініміздің негізгі қағидаларын түсіндіріп, калима шахадатты (иман сөзі) үйретті. Иман келтірген азамат Алланың бірлігіне, Мұхаммед пайғамбардың ﷺ елшілігіне куәлік беріп, мұсылман болудың жауапкершілігін жүрекпен сезінді.

Іс-шара барысында имам Мәулен Кәсенұлы жаңа мұсылманға арнайы сый-сияпат ұсынып, мешіт жамағаты атынан ізгі тілектерін жеткізді. Сондай-ақ мешіттің оқу-ағарту бағытындағы жұмысымен таныстырып, дінді дұрыс меңгеруіне қолдау көрсетілетінін айтты.

Бұл оқиға жиналған жамағаттың жүрегіне әсер етіп, жұма алдындағы рухани дайындыққа ерекше серпін берді. Құран аяттары оқылып, жаңа мұсылман үшін арнайы дұға жасалды.

Имам Мәулен Кәсенұлы:
«Ислам – ұлт пен ұлысты айырмайтын, барша адамзатқа ортақ хақ дін. Кімде-кім Алланы танып, жүрегімен иман келтірсе, ол біздің бауырымыз. Мұсылман болу – үлкен нығмет әрі жауапкершілік. Бүгін исламды қабылдаған бауырымызға Алла Тағаладан туралық пен сабыр тілейміз», – деп атап өтті.

Бұл оқиға – Шахтинск қаласындағы діни-ағарту жұмыстарының нақты жемісі. Айта кету керек, «Нұр» мешіті соңғы жылдары халықпен тығыз байланыс орнатып, тәрбиелік және рухани бағытта ауқымды іс-шаралар өткізуді жолға қойған.

Ислам дінін қабылдаған әрбір жан – бүкіл мұсылман үмметі үшін сүйінші хабар. Бұл оқиға – жүректердің һидаятқа жетуінде шекара жоқ екенін, Алланың мейірімі барша адамзатқа ашық екенін айғақтайды.

ҚМДБ Қарағанды облысы өкілдігінің баспасөз қызметі.