Қарағанды облыстық «Әнет баба» мешітіне қарасты «Ханифа» қыздар даму клубының ұйымдастыруымен «Құрбан айт – ұлық мереке» атты танымдық іс-шара өтті.

Рухани басқосуға қыз-келіншектер жамағаты қатысты. Іс-шара барысында Құрбан айттың мән-маңызы мен құрбандық шалудың тарихына қатысты бейнеролик көрсетілді.

Қатысушылар арасында сұрақ-жауап ойыны ойнатылып, мерекелік көңіл-күй қалыптасты. Сонымен қатар жиналғандар бір-біріне мерекенің қуанышын сезіндіру мақсатында сыйлықтар табыстады.

ҚМДБ Қарағанды облысы өкілдігінің баспасөз қызметі