Қарағанды қаласындағы «Әл-Ғаффар» мешітінде 2025 жылғы жаз мезгілінде басталатын дәстүрлі «Имани жаз – 2025» діни сауат ашу курсына дайындық жұмыстары жүргізіліп жатыр. Жоспарлы жиынды мешіттің бас имамы Ермахан Оралбай жүргізіп, оқу барысына қатысты нақты тапсырмалар берді.

Аталған курс Қазақстан мұсылмандары діни басқармасының бекіткен оқу-әдістемелік бағдарламасына сай өткізіледі. Бағдарлама аясында мектеп жасындағы балалар мен жасөспірімдерге діни білім беру, имандылыққа тәрбиелеу және отансүйгіштік рух қалыптастыру көзделген.

Қазіргі уақытта оқу аудиторияларын әзірлеу, оқу құралдарын дайындау, ұстаздар құрамын бекіту және санитарлық талаптарға сай қауіпсіз оқу ортасын қалыптастыру бағытындағы жұмыстар атқарылып жатыр.

«Имани жаз – 2025» курсы барысында шәкірттер Құран әліппесі мен тәжуид ережелерін меңгеріп, ахлақ пен әдеп сабақтарынан тәлім алады. Сонымен қатар ұлттық құндылықтарды насихаттайтын танымдық бағдарламалар мен тәрбиелік ойындар өткізу жоспарланған.

«Әл-Ғаффар» мешіті бұл жазғы курс арқылы балалардың жан-жақты рухани дамуына ықпал етіп, имани тәрбие алуға мүмкіндік жасауды мақсат етіп отыр.

ҚМДБ Қарағанды облысы өкілдігінің баспасөз қызметі