2025 жылғы 12 маусым күні Қарағанды қаласындағы «Әл-Ғаффар» мешітінде дәстүрлі «Имани жаз – 2025» жазғы діни сауат ашу курсының ашылу рәсімі өтті. Игі бастама мешіттің бас имамы Ермахан Оралбайдың ақ батасымен басталды.

Жазғы курс аясында мектеп жасындағы балаларға Құран әліппесі, тәжуид ережелері, әдеп пен ахлақ негіздері оқытылады. Сонымен қатар рухани-мәдени тәрбиеге басымдық беріліп, түрлі танымдық және тәрбиелік бағыттағы іс-шаралар ұйымдастырылмақ.

«Имани жаз – 2025» курсы Қазақстан мұсылмандары діни басқармасы бекіткен оқу-әдістемелік бағдарлама негізінде өткізіліп, жас буынның діни білімін жетілдіруге және имани құндылықтарды бойына сіңіруге бағытталады.

Курс барысында шәкірттерге тек діни сауат берумен шектелмей, оларды отансүйгіштікке, көркем мінез-құлыққа тәрбиелеу де басты назарда болмақ. Мешіт ұстаздарының айтуынша, бұл бастама балалардың рухани кемелденуіне жол ашып, оларды елге, қоғамға пайдалы азамат етіп қалыптастыруға үлес қосады деген сенім бар.

ҚМДБ Қарағанды облысы өкілдігінің баспасөз қызметі