Қарағанды қалалық «Бұқар Жырау» мешітінің ұйымдастыруымен «Қамқорлық орталық» қайырымдылық мекемесінде Құрбан айт мерекесіне орай игі кездесу өтті.

Мешіттің найб имамы Аманбол Рымқұлұлы арнайы зиярат жасап, орталық тұрғындарын ұлық мерекемен құттықтады. Қонақтарды мекеме басшысы Әбдрахман Дархан өзі қарсы алып, ризашылығын білдірді.

Дін қызметкері дастарқан басында Құран аяттарын бағыштап, тағылымды уағыз-насихат айтты. Сондай-ақ орталықта пана тауып отырған отызға жуық азаматпен сұхбаттасып, хал-жағдайларын сұрады.

Іс-шара аясында мешіт тарапынан құрбандық еті мен азық-түлік өнімдері үлестірілді. Бұған дейін де «Бұқар Жырау» мешіті орталыққа төсек-орын және тұрмыстық қажеттіліктермен жәрдемдесіп келген. Өз кезегінде мекеме басшылығы мешіт ұжымына алғысын жеткізді.

ҚМДБ Қарағанды облысы өкілдігінің баспасөз қызметі