Қарағанды облысы, Шет ауданының «Жанқұтты би» мешітінде «Имани жаз – 2025» атты жазғы сауат ашу курсы өз жұмысын бастады. Бұл игі бастама жас ұрпақтың рухани тәрбиесіне оң әсер етіп, имандылыққа баулитын маңызды қадамдардың бірі саналады.

Курс бағдарламасы келесі бағыттарды қамтиды:
• Имандылық әліппесі – балаларға Ислам дінінің негіздері, көркем мінез-құлық пен адамгершілік қасиеттері үйретіледі;
• Құран әліппесі – Құран әріптері мен оқу дағдыларын меңгеруге арналған сабақтар жүргізіледі;
• «Мұсылманның 40 парызы» – мұсылман баласының білуі қажет діни міндеттері мен парыздары кеңінен түсіндіріледі.

Курс барысында мешіт ұстаздары жас өрендерге дін негіздерін қарапайым әрі қызықты тәсілдермен жеткізіп, ұлттық және рухани құндылықтарды бойларына сіңіруге барынша күш салады.

Мұндай тәрбиеге негізделген жазғы сауат ашу курстары балалардың уақытын тиімді өткізуге, рухани өсуіне және имандылыққа бет бұруына үлкен сеп болады.

ҚМДБ Қарағанды облысы өкілдігінің баспасөз қызметі