Қарағанды қалалық «Төлеутай ата» мешітінде әйелдер жамағатына арналған тәрбиелік-танымдық семинар өтті. Игі іс-шараны мешіт ұстазы Фатима Аманболдықызы ұйымдастырды.

Семинарға арнайы қонақ ретінде Қарағанды қалалық «Әл-Машани» мешітінің ұстазы Бақытгүл Айтқалиқызы шақырылып, қатысушыларға маңызды тақырыптар төңірегінде мазмұнды дәріс оқыды.

«Әйел және отбасы» деп аталған бұл басқосуда әйел затының қоғамдағы орны, ананың қадірі, жанұядағы тәрбиенің маңызы, ер мен әйелдің діндегі міндеттері кеңінен қозғалды. Ұстаздар ислам дінінің әйелдерге берген мәртебесі мен құқықтары туралы нақты дәлелдер келтіріп, қатысушыларға пайдалы мағлұматтар ұсынды.

Семинар барысында жанұядағы татулық, ерлі-зайыптылардың өзара түсіністігі, бала тәрбиесіндегі ананың рөлі мен діндегі жауапкершілік секілді өзекті мәселелер де сөз болды. Қатысушылар көкейлеріндегі сұрақтарын қойып, тәжірибелі ұстаздардан нақты әрі тұшымды жауаптар алды.

Іс-шара соңында ұйымдастырушылар тәрбиелік мәні зор мұндай жиындардың алдағы уақытта да жалғасын табатынын атап өтті. Қатысушылар пайдалы кездесулер үшін алғыстарын білдіріп, рухани серпіліспен тарқасты.

ҚМДБ Қарағанды облысы өкілдігінің баспасөз қызметі