Қарағанды қалалық «Әл-Ғаффар» мешітінде жазғы мезгілде дәстүрлі түрде ұйымдастырылған «Имани жаз – 2025» діни сауат ашу курсы өз мәресіне жетті. Бұл курс балалар мен жасөспірімдердің жазғы демалыс уақытын тиімді әрі рухани тұрғыдан пайдалы өткізуге бағытталды.

Оқу барысында шәкірттер Құран әліппесін меңгеріп, тәджуид ережелерімен танысты. Сондай-ақ Ислам дінінің негіздері, күнделікті дұғалар, әдеп-ахлақ сабақтары және Пайғамбарымыздың (Оған Алланың салауаты мен сәлемі болсын) өмірінен өнегелі деректер оқытылды. Танымдық ойындар мен тәрбиелік іс-шаралар арқылы балалардың рухани ой-өрісін кеңейту көзделді.

Сабақтар мешіт жанындағы арнайы оқу бағдарламасына сай, тәжірибелі ұстаздардың жетекшілігімен өткізілді. Курстың соңында шәкірттерге арнайы сертификаттар табысталып, бітіру кеші ұйымдастырылды. Ата-аналар мен қатысушылар аталмыш жобаның балалар тәрбиесіне қосқан үлесін жоғары бағалап, шынайы алғыстарын білдірді.

ҚМДБ Қарағанды облысы өкілдігінің баспасөз қызметі