Қарағанды қалалық «Төлеутай ата» мешітінде өтіп жатқан дәстүрлі «Имани жаз – 2025» жазғы сауат ашу курсының шәкірттері қорытынды емтиханнан өтті.

Курс жаз айларының басынан бастап, мешіт жанында ұйымдастырылып, жас буынның діни сауатын арттыруды көздеді. Сауат ашу сабағына қатысқан шәкірттер Құран әліпбиін тану, иман әліппесі, намаз үйрену, иман шарттары мен діни әдептер сияқты негізгі тақырыптарды қамтып, білімдерін жетілдірді.

– Жазғы сауат ашу курсының мақсаты – жас ұрпаққа діни білім беріп қана қоймай, олардың бойында имандылық, адамгершілік, отансүйгіштік қасиеттерді қалыптастыру. Шәкірттеріміз осы дәріс барысында жақсы нәтиже көрсетіп, белсенділік танытты. Бұл – ата-аналар мен ұстаздардың ортақ еңбегінің жемісі, – деді мешіт ұстаздары.

Емтихан қорытындысы бойынша үздік нәтиже көрсеткен шәкірттерге жүлделі сыйлықтар, дипломдар мен алғыс хаттар табысталды. Сонымен қатар барлық қатысушыларға естелік сыйлықтар берілді.

Айта кетейік, Қарағанды қалалық «Төлеутай ата» мешітінде жыл сайын жазғы сауат ашу курсы ұйымдастырылады. Бұл игі дәстүр жас ұрпақтың рухани тәрбиесіне және олардың дұрыс діни түсінігін қалыптастыруға зор үлес қосып келеді.

ҚМДБ Қарағанды облысы өкілдігінің баспасөз қызметі