Қарағанды қалалық «Төлеутай ата» мешітінде дәстүрлі түрде ұйымдастырылған «Имани жаз – 2025» жазғы діни сауат ашу курсы өз жұмысын аяқтады.

Жазғы демалыс уақытында мектеп жасындағы балалардың бос уақытын тиімді өткізіп, рухани тәрбиесін арттыруды мақсат еткен бұл курста шәкірттерге ислам әдебі, иман негіздері, Құран әліппесі секілді пәндер оқытылды.

Сонымен қатар ұстаздар жасөспірімдерге ата-ананы құрметтеу, бауырмалдық, адалдық, мейірімділік сияқты асыл құндылықтарды насихаттап, олардың бойында көркем мінез қалыптастыруға айрықша көңіл бөлді.

Курс барысында балалар тек діни білім алып қана қоймай, түрлі тәрбиелік ойындар мен танымдық бағдарламаларға қатысты. Нәтижесінде шәкірттер Құран әріптерін танып, қысқа сүрелер мен дұғаларды жаттап, ислам дінінің негізгі қағидаларын меңгерді.

Қорытынды іс-шарада мешіт имамы Рауан Төлеубекұлы шәкірттерге жылы лебізін білдіріп, үздік нәтиже көрсеткен оқушыларды марапаттады. Атап айтқанда, І орын иегеріне велосипед, ІІ орынға ұялы телефон, ІІІ орынға планшет сыйға тартылды.

Сондай-ақ барлық қатысушыларға сертификаттар мен естелік сыйлықтар табысталды.

Аталған рәсңм соңында ата-аналар өз ризашылықтарын білдіріп, осындай пайдалы әрі тәрбиелік мәні зор курстардың маңыздылығын атап өтті. Олар мешіт ұстаздары мен ұйымдастырушыларға алғыс айтып, бұл игі дәстүрдің жалғасын табуына тілектестік білдірді.

ҚМДБ Қарағанды облысы өкілдігінің баспасөз қызметі