Қазақстан мұсылмандары діни басқармасының Қарағанды облысына қарасты Абай аудандық орталық мешітінде дәстүрлі «Имани жаз – 2025» жазғы сауат ашу курсы өз мәресіне жетті.

Жаз бойы ұйымдастырылған діни білім беру курсына ауданның жас өрендері қатысып, Құран әліпбиі, намаз негіздері, иман шарттары, Пайғамбарымыздың (Оған Алланың игілігі мен сәлемі болсын) өмірбаяны және күнделікті өмірде қолданылатын діни әдептер бойынша дәрістер тыңдады.

Шәкірттер қысқа мерзім ішінде діни сауатын ашып қана қоймай, адалдық, қайырымдылық, ата-ананы құрметтеу, бауырмалдық, үлкенге ізет, кішіге ілтипат сынды ұлттық және рухани құндылықтарды бойына сіңірді.

Курс соңында арнайы қорытынды іс-шара ұйымдастырылып, мешіт ұстаздары шәкірттерге ізгі тілектерін білдірді. Үздік нәтиже көрсеткен балаларға арнайы сыйлықтар мен сертификаттар табысталды.

– «Имани жаз» – жастардың бос уақытын тиімді өткізуге, діни сауатын арттыруға, ұлттық тәрбие беруге бағытталған маңызды жоба. Биылғы курсқа қатысқан шәкірттеріміз белсенділік танытып, жақсы нәтиже көрсетті. Алдағы уақытта да осындай игі істер жалғасын табады, – деді аудан имамы.

Ата-аналар мен жамағат ұйымдастырушыларға алғыс айтып, балаларға рухани тәрбие берудің маңызын ерекше атап өтті.

Айта кетейік, «Имани жаз» жобасы еліміздің түкпір-түкпіріндегі мешіттерде жыл сайын дәстүрлі түрде өткізіліп келеді. Бұл – жас ұрпақтың дұрыс діни түсінігін қалыптастырып, оларды имандылық пен адамгершілікке баулудың тиімді жолдарының бірі.

ҚМДБ Қарағанды облысы өкілдігінің баспасөз қызметі