Қарағанды қаласындағы «Әл-Машани» мешітінде қыз балалардан құралған шәкірттер Ақжан әл-Машани атамыздың немересі Раушан Мағжанқызы Жақсыбекпен кездесті.

Рухани жүздесу барысында қадірлі апамыз шәкірттерге «Қыз тәрбиесі – ұлт тәрбиесі» тақырыбында тағылымды уағыз-насихат айтып, қазақ қызына тән инабаттылық пен ибалылық, ар-ұят, ата-анаға құрмет секілді қасиеттер жайында өнегелі ойларын бөлісті.

– «Ұлтыңды тәрбиелеймін десең – ұлыңа, халқыңды тәрбиелеймін десең – қызыңа тәлім бер» деген сөз тегін айтылмаған. Өйткені қыз – ертеңгі ел анасы, ұлттың ұйытқысы, – деді Раушан апа.

Сондай-ақ ол «Әл-Машани» мешітіне осыдан 6-7 жыл бұрын келгенін айтып, бүгінгі өзгерістерге ерекше қуанышын білдірді. Мешіт жамағатының көбейіп, шәкірттердің сапалы діни білім алып жатқанын көріп, ризашылығын жеткізді.

Кездесу соңында Раушан апамыз ата-бабалар рухына Құран бағыштап, шәкірттерге ақ батасын берді.