Қарағанды облысына қарасты Шет ауданындағы «Жанқұтты би» мешітінің жамағаты Қазақстан мұсылмандары діни басқармасы бастамасымен қолға алынған «Дархан дала» жобасы аясында табиғат аясында бас қосып, рухани отырыс ұйымдастырды.

Игі іс-шараның мақсаты – жамағат арасындағы бірлік пен бауырмалдықты нығайту, табиғатты аялауға үндеу, сондай-ақ дін мен дәстүрдің сабақтастығын насихаттау. Жанға жайлы табиғи ортада өткен кездесуде жамағат рухани тынығып, тағылымды уағыз тыңдады.

Жоба аясында мешіт ұстазы Қарубай Берікұлы Аллаға шүкір ету, дұрыс сенімде болу, адалдық пен ізгі амалдардың маңызы жайында әсерлі насихат айтты. Сонымен қатар мұсылманның күнделікті өмірдегі мінезі, отбасына, қоғамға және қоршаған ортаға деген қарым-қатынасы қандай болуы қажет екенін кеңінен түсіндірді.

Жиын барысында сұрақ-жауап пен пікір алмасу ұйымдастырылып, жамағат ерекше әсермен тарқасты. Қатысушылар мұндай кездесулердің рухани серпіліс беріп, діни білімдерін арттыруға үлкен сеп болатынын атап өтті.

Кездесу соңында жамағат бірге ас ішіп, табиғат аясында серуендеп, бір-біріне ізгі тілектерін арнады. Ұйымдастырушылар «Дархан дала» жобасының алдағы уақытта да жалғасын табатынын жеткізді.

ҚМДБ Қарағанды облысы өкілдігінің баспасөз қызметі